शारदा पोखरेल,बारा
कलैया उपमहानगरपालिका ७ का शिवनारायण यादवका दुई श्रीमती बिच सधैजसो घरझगडा हुन्थ्यो । ५५ वर्षिय जेठी श्रीमती तेतरी देविका सन्तान थिएनन् भने हातमा नागरिकता पनि थिएन । यादवले कान्छी श्रीमती धनमन्ती देवि र उनका २ छोराको भने नागरिकता बनाईदिएका थिए ।
सन्तान नभएका कारण तेतरीलाई लोग्ने, सौता उनका छोराहरुले हेला गर्थे । तेतरी लोग्नेसँग सधै नागरिकता बनाईदिन अनुरोध गर्थिन तर बिहे गरेको ४० वर्ष बितिसक्दा पनि शिवनारायण यादवले जेठी श्रीमती तेतरीलाई नागरिकता बनाउन कहिल्यै चासो देखाएनन् ।
घरमा सधैजसो झगडा हुने भएकोले छिमेकीले पनि खासै चासो राख्दैनथे । विहिवार (भदौ ३० गते) साँझ तेतरी घाँसदाउरा गरेर घरबाहिर बाटो छेउमा बसिरहेकी थिईन् । घरमा सामान्य वादविवाद भईरहेको थियो ।कान्छी श्रीमती धनमन्ती देवि भने सम्पति दिनुपर्ने भन्दै नागरिकता नबनाउन लोग्नेलाई दवाव दिईरहेकी थिईन् । सोही क्रममा बिवाद बढ्दै गएपछि कान्छी स्वास्नीको तर्फको जेठो छोरा जयप्रकाश यादवले धारिलो हतियार प्रयोग गरेर तेतरीको हत्या गरेका छन् ।
घाँटीमा धारिलो हतियार प्रयोग गरेर बसिरहेकै ठाँउमा हत्या गरेर जयप्रकाश र उनकी आमा धनमन्ती देवि फरार भएको स्थानियहरुले बताएका छन् । मृतक तेतरीका दाजु लक्ष्मी राउत २५/३० वर्षदेखि नागरिकता बनाईदिन अनुरोध गर्दा सुनवाई नभएको बताउछन् । ‘हामीले वडा कार्यालय मार्फत पनि दवाव दिन लगायौ तर सुनवाई भएन’ मृतका दाजु लक्ष्मि राउत यादवले भने । जयनारायण यादवले यसअघि पनि तेतरीलाई पटक पटक यातना दिएको मृतकका माईती पक्षले बताएका छन् ।
सो घटनामा मृतका दाजु लक्ष्मी राउतले जिल्ला प्रहरी कार्यालय बारामा शिवनारायण यादव, जयकिशोर यादव र धनमन्ती देवि यादवको नाममा किटानी जाहेरी दिएका छन् । जाहेरीमा मृतक तेतरी देविलाई लोग्ने, कान्छी स्वास्नी (सौता) छोराहरु मिलेर अंश नदिने उद्देश्यले नागरिकता समेत नबनाईदिएको, खान लाउन माग्दा घरमा विवाद हुने गरेकाले लोग्ने,कान्छी श्रीमती र छोराले नियोजित ढंगले हत्या गरिएको उल्लेख छ ।
स्थानिय राजु यादवका अनुसार विहिवार साँझ दुई श्रीमती बिचमा नागरिकता विषयमा विवाद भईरहेको अवस्थामा जयकिशोर यादवले धारिलो हतियार प्रयोग गरेर तेतरीको हत्या गरेको बताएका छन् ।
सो घटनामा पोष्टमार्टम पश्चात मृतकका माईती पक्ष र स्थानियले तेतरीको दाहसंस्कार गरेका छन् । तेतरीलाई नागरिकता बनाईदिदा सम्पति दिनुपर्ने भन्दै परिवारका सदस्यहरुकै मिलेमतोमा उनको हत्या भएको स्थानियहरुले बताएका छन् ।
जिप्रका बारा महिला, वालवालिका तथा जेष्ठ नागरिक शाखा प्रमुख भिम ओली जिल्लामा चालु आवको २ महिनामा बहुविवाह १७ वटा मुद्दा दर्ता भएको बताउछन् । जिप्रका बाराको तथ्याकं अनुसार चालु आवमा कर्तव्य ज्यानमा ११ वटा ,ज्यान मार्ने उद्योगमा ३५ वटा मुद्दा दर्ता भएका छन् । महिला शाखा प्रमुख ओलीका अनुसार घरेलु मदिरा, बहुविवाह, वोक्सीको आरोप, जबरजस्ती करणी लगायत कारणले महिलामाथि हिसांका घटना हुने गरेको जनाएका छन् ।
नेपाल मिडिया हाउस प्रा.लि.
ललितपुर, नेपाल
ईमेल: [email protected] (समाचारको लागी)
ईमेल: [email protected] (बिज्ञापनको लागी)
कार्यालय फोन- +977- 015554815, 5549880
स्थायी लेखा नम्बर- 604369660
कम्पनि रजिष्टर नं.- 160287/073/074
सूचना विभाग दर्ता नम्बर: २४६३/०७७-०७८