बारा, अशोज १९
आस्रन निर्वाचनका लागि प्रतिनिधि सभा सदस्य तर्फ गठबन्धन दलका ‘दावेदार उम्मेदवार’हरुको दशै पर्व परिवारका सदस्यहरुसँग बसेर रमाईलो गर्न भन्दा टिकटको दौड, कार्यकर्ता तथा शुभेच्छुक भेटघाटमा व्यस्त देखिएको छ ।
प्रतिनिधि सभा सदस्यका लागि गठबन्धन दलहरुबीच टिकट बाँडफाँट टुंगिएसँगै दावेदार उम्मेदवार बडादशैलाई आफन्त परिवारका सदस्यहरुसँग बसेर रमाईलो गर्नुभन्दा राजनीतिक भेटघाटमा व्यस्त देखिएका हुन् । बाराको ४ वटा संघीय निर्वाचन क्षेत्र मध्ये क्षेत्र नं १ नेपाली कांग्रेस, २ र ३ जनता समाजवादी पार्टी (जसपा) र क्षेत्र नं ४ नेकपा एकीकृत समाजवादी पार्टीको भागमा परेको छ । जसमध्ये क्षेत्र नं १ मा उमाकान्त चौधरी, २ र ३ मा क्रमशं रामसहाय प्रसाद यादव र रामबाबु कुमार यादवको नाम निश्चित प्रायं भएको छ ।
कांग्रेस र जसपाले २०७४ मा निर्वाचित पुरानै अनुहारलाई यसपटक पनि पुनं दोह्रोर्याउने तयारीमा छन् । २०७४ को निर्वाचनमा तनहुँ क्षेत्र नं १ मा कांग्रेस वरिष्ठ नेता रामचन्द्र पौडेललाई पराजित गरेका किसान श्रेष्ठ भने यसपटक बारा क्षेत्र नं ४ बाट उम्मेदवार बन्ने भएका छन् । श्रेष्ठ बिगतमा परिवारका सदस्य, आफन्त र साथीभाईहरुसँग बसेर रमाईलो गरेर मनाउने दशै पर्व यसपटक चुनावी चहलपलहका कारण कार्यकर्ता र शुभेच्छुक भेटघाटमा व्यस्त भएको बताउछन् । दशैको अवसर पारेर जितपुर सीमरा उपमहानगर,४ स्थित श्रेष्ठको निवासमा दैनिक सयौको संख्यामा कार्यकर्ता तथा शुभेच्छुकहरु आउजाउ, पार्टी प्रवेश लगायत दैनिक विभिन्न कार्यक्रमहरु हुने गरेको छ ।
यता, नेपाली कांग्रेस बारा क्षेत्र नं १ का उम्मेदवार खानेपानी मन्त्री तथा कांग्रेस सहमहामन्त्री उमाकान्त चौधरी आस्रन निर्वाचनकै कारण यसपटक ९० वर्षिय वृद्व आमाको हातको टिका लगाउन गृह जिल्ला आउन नभ्याउने भएका छन् । सिट बाँडफाँडको विषयलाई लिएर आज पनि गठबन्धन दलहरुबीच बैठक बसिरहेको छ । ‘देशभरको टिकट बाँडफाँट अव २ दिनभित्र टुंगो लगाउनुपर्ने र उहाँ आफै टिकट बाँडफाँट कार्यदलमा भएका कारण यसपटक दशैमा मन्त्री ज्यु गृह जिल्ला जाने अवस्था छैन्’ खानेपानी मन्त्री चौधरीको सचिवालय सदस्य ह्रदयराज मिश्रले भने ‘उहाँ अव एकैपटक उम्मेदवारी मनोनयनको दिन (अशोज २३) गते) मात्रै जिल्ला जाने कार्यक्रम छ’
वर्षेनी दशैमा आमाको हातको टिका लगाउन कोहल्वी नगरपालिका २ बेलवा आफ्नो निवासमा आउने मन्त्री चौधरी यसपटक निर्वाचन गतिविधिका कारण एकैपटक उम्मेदवारी मनोनयनको दिन जिल्ला आउने सचिवालयले जनाएको छ । यता बारा क्षेत्र नं २ मा दावेदार उम्मेदवार पूर्व वन मन्त्री तथा जनता समाजवादी पार्टीका केन्द्रीय सदस्य रामसहाय प्रसाद यादव पनि पार्टीको तर्फबाट टिकट बाँडफाँट समिति सदस्यमा भएका कारण दशैमा गृह जिल्ला बारा आउन भ्याएनन् ।
हिन्दु धर्मालम्बीहरुको महान् पर्व दशैलाई मधेशमा माटोले देविको मुर्ती बनाएर ठाँउ ठाँउमा स्थापना गर्ने र घरका महिलाहरु निराहार ब्रत बसेर दुर्गाको पुजा गर्ने प्रचलन छ । ‘मधेशमा घटस्थापना देखि दशमीसम्म घरका सदस्यहरु ब्रत बस्ने र दशमीको दिन ब्रत बसेको सदस्य वा पण्डितको हातबाट जमरा लगाउने हामी कहाँ प्रचलन छ’ बारा क्षेत्र नं ३ का निवर्तमान संघीय सांसद रामबाबु यादवले रातोपाटीसँग भने ‘पहाडी समुदायमा जस्तो आफ्ना आफन्तको घरमा पुगेर आफु भन्दा ठुलाको हातबाट टिका लगाउने चलन हामीकहाँ छैन्’ ।
मधेशमा घरका सम्पुर्ण सदस्यहरुले दशैको पहिलो दिन घटस्थापना देखि अष्ट्रमीसम्म कपाल, दाह्री काट्न नहुने र माछामासु समेत नखाने प्रचलन छ ।
सघीय सांसद यादवले यसपटक राजनीतिक भेटघाट सँगै नवदुर्गाभर आफ्नो निर्वाचन क्षेत्रमा देवी स्थापना भएका प्रत्येक ठाँउमा पुगेर पुजापाठ गर्ने, प्रसाद ग्रहण गर्ने काममा सहभागी भएको बताउछन् । ‘यसपटक निर्वाचन गतिविधि शुरु भएपनि कार्यकर्ता भेटघाट सँगसगै दुर्गा स्थापना गरिएको ठाँउमा पुगेर प्रसाद ग्रहण गर्ने काम रोकिएको छैन्’ उनले भने । बारा क्षेत्र नं ४ का प्रतिनिधि सभा सदस्यका उम्मेदवार किसान श्रेष्ठ पनि आफ्नो निर्वाचन क्षेत्रमा पार्टी कमिटीका पालिका प्रमुख, जिल्ला कमिटी सदस्य तथा शुभेच्छुकहरुसँग भेटघाटमा व्यस्त छन् ।
‘जनताको काम गरेपछि चुनाव जित्न गाह्रो छैन्,बेरोजगार युवाहरुलाई रोजगारीको यहि व्यवस्था मिलाउने, व्यापार गर्ने, कृषि गर्नेलाई कसरी सहयोग गर्ने भन्ने धेरै योजना छन् मसँग’ फेटाँ, प्रसौनी, परवानीपुर,बिश्रामपुर गाँउपालिका पार्टी कमिटी प्रमुख तथा जिल्ला कमिटि सदस्यहरुसँगको भेटघाटमा पूर्व श्रम मन्त्री श्रेष्ठले भने ‘म पैसा कमाउन राजनीतिमा आएको होईन, बारा क्षेत्र नं ४ को बिकास मेरो पहिलो प्राथमिकता हो’ ।
नेपाल मिडिया हाउस प्रा.लि.
ललितपुर, नेपाल
ईमेल: [email protected] (समाचारको लागी)
ईमेल: [email protected] (बिज्ञापनको लागी)
कार्यालय फोन- +977- 015554815, 5549880
स्थायी लेखा नम्बर- 604369660
कम्पनि रजिष्टर नं.- 160287/073/074
सूचना विभाग दर्ता नम्बर: २४६३/०७७-०७८