अत्याधिक चिसो बढेपछि ढोरपाटनका विद्यालय बन्द

काठमाडौं । अत्यधिक चिसो बढेपछि बागलुङको ढोरपाटन उपत्यका क्षेत्रका विद्यालय बन्द गरिएका छन् ।

ढोरपाटन नगरपालिका–९ ढोरपाटनका ६ वटा विद्यालय बन्द गरिएको छ भने एउटा विद्यालय घुम्ती पढाइका लागि बेँसीमा झारिएको छ ।
ढोरपाटन नगरपालिकाका शिक्षा शाखाका अनुसार गत पुस १५ गतेबाट बन्द गरिएका विद्यालय आगामी फागुन १ गतेबाट मात्रै सञ्चालन हुने जनाएको छ। ती ६ वटा विद्यालयमा करिब तीन सय विद्यार्थी अध्ययनरत छन् ।

शाखाका अनुसार “ढोरपाटन उपत्यका क्षेत्रका ६ वटा विद्यालय बन्द छन्, अब फागुन लागेपछि मात्रै खुल्छन्, एउटा जनवादी आधारभूत विद्यालय भने बोबाङ झरेको छ, पहिलेदेखि नै घुम्ती विद्यालय हो, यो बर्खामा ढोरपाटन, हिउँदमा बोबाङबाट पढाइ हुन्छ, यहाँका स्थानीय पनि हिउँद–बर्खा छुट्टाछुट्टै ठाउँमा बस्ने हुँदा विद्यालय पनि सोहीअनुसार सञ्चालन भएको जनाएको छ।”

सिद्धबराह प्राथमिक विद्यालयका अनुसार यो याममा ढोरपाटनमा पठनपाठन गर्न नसकिने हुँदा विद्यालय बन्द गर्नुपरेको जनाएको छ। यहाँका विद्यालयमा अधिकांश सानो उमेरका बालबालिका अध्ययन गर्ने हुँदा उनीहरूलाई चिसोबाट बचाउनका विद्यालय बन्द गर्नुको विकल्प नभएको जनाएको छ। साथै ठाउँ चिसो र त्यसमाथि सिमेन्टका भवनमा बसेर अध्ययन गर्दा बालबालिका बिरामी हुने गरेका छन्।