पोखरा थिएटरको गन्धर्व नाटकघरमा ‘१२ दुर्वासा’ नाटक मञ्चन सुरू

काठमाडौं । पोखरा थिएटरको गन्धर्व नाटकघरमा गत पुस २६ गतेदेखि मञ्चन सुरुभएको नाटक ‘१२ दुर्वासा’ नाटक १९ पटक पटक प्रदर्शन गरिएको छ ।

पोखरा थिएटरका अध्यक्ष परिवर्तनको निर्देशनमा तयार भएको नाटकमा उनीसहित १३ कलाकारले अभिनय गरेका थिए । अभिनय गर्नेमा रमेशबाबु तिमल्सिना, अनुषा परियार, रवीन्द्र मल्ल, सुसन पौडेल, रोशनी रामदाम, धनकाजी श्रेष्ठ, अञ्जु दाहाल, गोपाल भुषाल, राजेन्द्र अधिकारी, मनोज अदित्य, दिप्सना विश्वकर्मा र रोहित पौडेल रहेका थिए ।

यसमा यसअघि मञ्चन भएका नाटकभन्दा केही फरक अनुभूति मिलेको दर्शकका साथै अभिनय गरेका कलाकार समेतले प्रतिक्रिया दिएका छन्। सबै जनाको मिहिनेतका कारण नाटक मञ्चन सफल भएको पोखरा थिएटरका संस्थापक सदस्यले जानकारी दिए।

अमेरिकन नाटककार रेग्नाल्ड रोजद्वारा लिखित नाटकको नेपाली अनुवाद सुरेश सापकोटाले गरेका थिए। नाटकका लागि पोखरा थिएटरको गन्धर्व नाटकघरमा ‘ट्राभर्स स्टेज’ निर्माण गरिएको र यस्तो स्टेजको प्रयोग गन्धर्व नाटकघरमा पहिलो भएको जानकारी दिए। ‘टुबेल एङ्ग्री म्यान’को नेपाली रुपान्तरण रहेको नाटकमा छोराले बुबालाई मारेको हो होइन भन्ने विषयमा केन्द्रित छ । यो विषयमा अदालतलाई निर्णय गर्न गाह्रो भएपछि फरक–फरक पृष्ठभूमिका १२ जनालाई छलफल गरी निर्णय गर्न लगाइन्छ ।

उनीहरूको विचारमा देखिने विविधता र सङ्घर्ष नै नाटकको विषयवस्तु थियो । यो विषयवस्तुलाई प्रभावकारी बनाउँदै निष्कर्षमा पुग्न कलाकारले गरेको अभिनयात्मक बहस प्रशंसायोग्य थियो । उनीहरूको रोचक बहसले दर्शकलाई आकर्षित गराएको थियो ।

सन् २०५४ मा टेली प्ले (टेलिभिजन सिरिज) का रुपमा रेग्नाल्डले यो नाटक लेखेका थिए। पछि सन् १९५७ मा फिल्म निर्माण भयो । त्यसपछि यो विश्वव्यापी रुपमा झनै चर्चित बन्यो । विश्वका विभिन्न भाषामा यसको नाट्य चलचित्र निर्माण भएका छन्। यस नाटकले वर्गीय, जातीय, क्षेत्रीय, लैङ्गिक समाजको चित्रण गरेको छ ।

लगातार विद्यार्थी केन्द्रित नाटक मञ्चन भइरहेको समयमा त्यसभन्दा भिन्न खालको नाटक प्रस्तुत गर्न गरिएको प्रयास सफल भएको निर्देशक एवं पोखरा थिएटरका अध्यक्ष परिवर्तनले बताए । यो नाटकबाट अभिनयको क्षेत्रमा समेत पुनः फर्किएका परिवर्तनले नाटक मञ्चनलाई भव्य बनाउन सहयोग गर्ने सबैप्रति आभार व्यक्त गरे ।