विराटनगरको चालु आ.व.को बजेट तीन अर्ब ३४ करोड ६७ लाख

काठमाडौं । विराटनगर महानगरपालिकाको नगरसभाको तेह्रौँ अधिवेशनले चालु आर्थिक वर्षको बजेट संशोधनसहित सम्पन्न भएको छ ।

आज विराटनगरमा आयोजित अधिवेशनमा सभाले रु तीन अर्ब २८ करोड पाँच लाख रहेको बजेटलाई संशोधन गरी रु तीन अर्ब ३४ करोड ६७ लाख १२ हजार पुर्याएको छ ।

सो अवसरमा महानगर प्रमुख नागेश कोइरालाले महानगरवासीले गर्व गर्न लायकको विराटनगर बनाउन इमान्दारितापूर्वक कार्य गरिरहेको बताए । रानीपोखरी, मण्डापोखरी, प्रधानमन्त्री पार्क, बालउद्यान, सन्ध्याकालीन आरती स्थल, महानगरको प्रशासनिक भवन, बहुप्राविधिक विद्यालय, विराटनगर–५ र ६ स्थित विएफएम अगाडिको सडक, विराटनगर–१३ स्थित आँखा अस्पताल अगाडिको सडक, विराटनगर–८ स्थित विश्वकर्मा चोकदेखि रेल्वे हुँदै सिंघियासम्मको सडक निर्माणलगायत रु एक अर्ब १५ करोडका विभिन्न योजना कार्यान्वयनको चरणमा रहेको उनले बताए ।

उपप्रमुख शिल्पा निराला कार्कीले चालु आर्थिक वर्ष २०८०/८१ को अर्धवार्षिक समीक्षा प्रस्तुत गरेकी थिइन् । अधिवेशनमा न्यायिक समितिका सदस्य तीर्थेन्द्र नेउपाने, अर्थ तथा सार्वजनिक लेखा समितिका संयोजक बलराम कारञ्जित, विधेयक समितिका संयोजक दीपककुमार कर्ण, आर्थिक विकास समितिका संयोजक श्याम घिमिरे, सामाजिक विकास समितिका संयोजक काजीबहादुर बस्नेत, पूर्वाधार विकास समितिका संयोजक कुमार पोखरेल, वन, वातावरण तथा विपद् व्यवस्थापन समितिका संयोजक वासु बहादुर बस्नेत, सुशासन तथा संस्थागत विकास समितिका संयोजक सूर्यलाल यादवले आआफ्नो समितिको प्रतिवेदन प्रस्तुत गरेका थिए ।

उक्त सभामा सदस्यहरू रोम भट्टराई, अञ्जु दाहाल, सुरज न्यौपाने लगायतले नगरको विकासका सम्बन्धमा विभिन्न सुझाव दिएका थिए । नगरसभाले नगर प्रहरी विधेयक, बजार व्यवस्थापन तथा अनुगमन विधेयक, कृषि विधेयकसहित विभिन्न विधेयक र ऐनसमेत पारित गरेको प्रमुख प्रशासकीय अधिकृत राजेन्द्र पराजुलीले जानकारी दिए ।