संघीय संसदको सोमवार हुने तेस्रो अधिवेशनको सम्भावित कार्यसूची सार्वजनिक

काठमाडौँ । संघीय संसदको भोलि (सोमवार) शुरु हुने तेस्रो अधिवेशनको पहिलो बैठकको सम्भावित कार्यसूची सार्वजनिक भएको छ।

संसद भवन नयाँ बानेश्वरमा अपराह्न ४ बजे बस्ने प्रतिनिधिसभाको पहिलो बैठकको शुरुमा सभामुख देवराज घिमिरेले राष्ट्रपतिबाट प्राप्त अधिवेशन आह्वानसम्बन्धी पत्रको व्यहोरा पढेर सुनाउने कार्यसूची रहेको छ।

त्यसपछि सभामुखले राष्ट्रपतिको कार्यालयबाट प्राप्त कार्यभार तोकिएको सम्बन्धी पत्र, प्रधानमन्त्री तथा मन्त्रिपरिषद्को कार्यालयबाट प्राप्त कार्यभार तोकिएको सम्बन्धी पत्रहरुको व्यहोरा पढेर सुनाउनेछन्।

भोलिकै बस्ने बैठकमा सभामुख घिमिरेले प्रतिनिधिसभा नियमावली, २०७९ को नियम १० बमोजिम बैठकको अध्यक्षता गर्नेको मनोनयनको निर्णय सुनाउनेछन्।

संसदका कार्यवाहक महासचिव पद्मप्रसाद पाण्डेयले आज सार्वजनिक गरेको कार्यसूचीमा राष्ट्रियसभामा उत्पत्ति भएको ‘विधुतीय व्यापार विधेयक, २०८० र राष्ट्रिय मर्यादासम्बन्धी विधेयक, २०७९’ का सम्बन्धमा राष्ट्रियसभाबाट प्राप्त सन्देशसहितको विधेयक टेबुल गरिने उल्लेख छ।

अर्थमन्त्री डा. प्रकाशशरण महतले ‘आर्थिक कार्यविधि तथा वित्तीय उत्तरदायित्व (पहिलो संशोधन) अध्यादेश, २०८०’ पेश गर्ने छन्।

यसका साथै कानून, न्याय तथा संसदीय मामिलामन्त्री धनराज गुरूङले मन्त्रिपरिषद्को निर्णयबाट जारी भएको बेपत्ता पारिएका व्यक्तिको छानबिन, सत्य निरुपण तथा मेलमिलाप आयोग ऐन, २०७१ को दफा ४२ बमोजिमको बाधा अड्काउ फुकाउ आदेश सदन समक्ष पेश गर्ने सम्भावित कार्यसूची रहेका छन्।