जुम्लामा हिउँमा फसेका व्यक्तिहरूको हेलिकप्टरमार्फत सकुशल उद्धार

काठमाडौं। जुम्लाको तातोपानी गाउँपालिका–४ स्थित बजेडी पाटनमा जडिबुटी संकलन गर्न गएको बेला हिउँमा फसेका व्यक्तिहरूको हेलिकप्टरमार्फत उद्धार गरिएको छ।

तातोपानी ही गाउँपालिका–७ बाँरागाउँ र मुछालदेउ गाउँका स्थानीय बासिन्दा फसेका थिए।

फागुन १८ गते पाटनमा सम्पर्कविहीन भएको जानकारी पाएपछि हेलिकप्टरबाट उद्धार गरिएको प्रमुख जिल्ला अधिकारी जयकुमार घिमिरेले जानकारी दिए। हिउँमा फसेका आठैजनाको हेलिकप्टरबाट सकुशल उद्धार गरिएको छ।

पालिका–४ स्थित गिडिदहको शिरान बजेडी पाटनमा फसेकालाई स्थानीय तह र प्रशासनको पहलमा कर्णाली प्रदेश सरकारको समन्वयमा हेलिकप्टरबाट उद्धार गरिएको प्रमुख जिल्ला अधिकारीले बताए।

कर्णाली प्रदेश सरकार आन्तरिक मामिला तथा कानून मन्त्रालयले नेपाली सेनाको हेलिकप्टरमा बजेडी पाटनदेखि जुम्ला विमानस्थलसम्म गरी तीन चरणमा उद्धार गरेको हो।

उद्धार गरिएकामध्ये तातोपानी गाउँपालिका–७ का दिया रावत, हरिशोभा रावत, सुशीला रावत, गोरी रावत, जगमती रोकाया र वडानम्बर ८ का अत रावत, संसार रावत, गोरी रावत रहेको जिल्ला प्रहरी कार्यालय जुम्लाले जनाएको छ।