अबण्डा बजेट करिब ७६ अर्ब

काठमाडौँ। सरकारले आगामी आर्थिक वर्ष २०८१/८२ का लागि अर्थ विविध शीर्षकमा करिब रु ७६ अर्ब बराबर विनियोजन गरेको छ।

कुनै पनि वार्षिक योजना तथा कार्यक्रममा नराखेर अबण्डा राखिएको बजेट रकम रू ७५ अर्ब ९५ करोड तीन लाख बराबर छ।

सरकारले आगामी आ.व.का लागि रू १८ खर्ब ६० अर्ब ३० करोड बराबरको बजेट ल्याउँदा कूल विनियोजनको चार दशमलव आठ प्रतिशत अर्थ विविध शीर्षकमा राखेको हो।

अर्थ विविध शीर्षकको रकम धेरै देखिनुलाई आर्थिक अनुशासनका हिसाबले राम्रो मानिँदैन ।

अबण्डामा बजेट राखेर खर्च गर्दा वित्तीय अनुशासन नहुने बताइन्छ। अबण्डामा राखेको बजेट दुरुपयोग हुने सम्भावना समेत बढी हुन्छ।