वीरगञ्ज औद्योगिक क्षेत्रको विधुत आपूर्ति सुधार गरिँदै

काठमाडौँ। औद्योगिक नगरी वीरगञ्ज र आसपासका क्षेत्रमा सहज विधुत आपूर्ति गर्न नेपाल विधुत प्राधिकरणले द्रुत गतिमा उच्च क्षमताका विधुत प्रसारण लाइन तथा सबस्टेसनको निर्माण सुरु गरेको छ।

औद्योगिक करिडोरमा सञ्चालित र आगामी दिनमा खुल्ने उद्योगलाई उच्च क्षमताको विधुतीय संरचना आवश्यक परेको हो। वीरगञ्जसहित बारा-पर्सा औद्योगिक करिडोरमा रहेका उद्योगलाई विधुत आपूर्ति गर्न चालु प्रसारण लाइन तथा सबस्टेसनको स्तरोन्नति भइरहेको प्राधिकरणले जनाएको छ। प्राधिकरणका अनुसार उच्च क्षमताका केही प्रसारण लाइन तथा सबस्टेसन निर्माणाधीन छन् भने केही प्रस्तावित छन्।

बारा–पर्सा औद्योगिक करिडोरमा पर्ने सिमरा, निजगढ, वीरगञ्ज, परवानीपुर, पोखरिया, प्रसौनी लगायतका क्षेत्रमा प्राधिकरणले उच्च क्षमताका विधुत प्रसारण तथा वितरणका पूर्वाधार क्रमिक रुपमा बनाउन लागेको हो।

प्राधिकरणले बाराको पथलैया (पिलुवा) सबस्टेसनदेखि परवानीपुर सम्मको करिब १८ किलोमिटर एक सय ३२ केभी डबल सर्किट प्रसारण लाइनको तार कन्डक्टर बदलेर नयाँ राख्ने काम अन्तिम चरणमा पुर्‍याएको छ। डबल सर्किटमध्ये एउटा सर्किटबाट विधुत आपूर्ति बन्द गरी पुरानो ‘कन्डक्टर’ निकाली उच्च क्षमता एचटिएलएस राख्ने काम भइरहेको छ।

एउटा सर्किटको काम सकिएपछि सञ्चालन गरी दोस्रो सर्किटको काम सुरु हुनेछ। प्रसारण लाइनको स्तरोन्नति आगामी असारको पहिलो हप्ताभित्र सक्ने गरी काम भइरहेको छ। पथलैया पिलुवा-परवानीपुर प्रसारण लाइनबाट करिब दुई सय मेगावाट प्रवाह गर्न सकिनेमा ‘कन्डक्टर’ बदलेपछि क्षमता दोब्बर हुने जनाइएको छ।

हेटौँडा–पथलैया पिलुवा एक सय ३२ केभी प्रसारण लाइनको पनि ‘कन्डक्टर’ बदलेर क्षमता दोब्बर बनाइसकिएको छ। यसले परवानीपुरतर्फ थप विधुत प्रवाहका लागि सहज हुनेछ। प्राधिकरणका कार्यकारी निर्देशक कुलमान घिसिङले शनिबार स्थलगत अनुगमन गरी ‘कन्डक्टर’ बदल्ने कार्य छिटो सम्पन्न गर्न निर्माण व्यवसायी र आयोजना व्यवस्थापनलाई आग्रह गरेका छन्।

कार्यकारी निर्देशक घिसिङले भने, “प्रसारण लाइनको क्षमता स्तरोन्नतिको कामका लागि एउटा सर्किट बन्द गर्नुपर्दा वीरगञ्ज क्षेत्रमा विधुत आपूर्तिको समस्या भएको गुनासो आइरहेको छ, अर्कोतर्फ पथलैयाबाट थप विधुत पठाउन नसक्दा भारतको रक्सौलबाट विधुत आयात गरिरहनु परेको छ, त्यसैले यस्तो संवेदशील अवस्थामा गम्भीर भएर तोकिएकै समय अघि काम सक्नुपर्छ।”

घिसिङले अब पथलैया–परवानीपुर प्रसारण लाइनको क्षमता हालकोभन्दा दोब्बर हुने भएकाले त्यस क्षेत्रमा खपत गरी बाँकी विधुत रक्सौलतर्फ निर्यात गर्न सकिने जानकारी दिए। वीरगञ्ज क्षेत्रका उद्योगहरुले एक सय ३२ केभी प्रसारण लाइनबाटै विधुत आपूर्ति लिन सक्ने गरी उच्च क्षमताका प्रसारण लाइन तथा सबस्टेसनहरु निर्माणाधीन रहेको उनले बताए।