बोलबम यात्रु चढेको ट्याक्टर दुर्घटनामा परी एकको मृत्यु, चार घाइते

टुडेदैनिक सम्वाददाता
साउन २० गते ।
सर्लाहीको मलङ्गवा नगरपालिका–१२, गम्हरियामा आइतबार बोलबमका तीर्थयात्री सवार ट्याक्टर नहरमा खस्दा एक जनाको मृत्यु भएको छ। मृतक ४५ वर्षीय पतही देवीका छोरीसहित चार जना घाइते भएका छन्। दुर्घटनामा गम्भीर घाइते चक्रघट्टा गाउँपालिका–५ पडरिया निवासी जोगिन्द्र मण्डलकी श्रीमती ४५ वर्षीया पतही देवीको उपचारको क्रममा वीरगन्जस्थित नेशनल मेडिकल कलेजमा आइतबार दिउँसो मृत्यु भएको जिल्ला प्रहरी कार्यालय सर्लाहीका सूचना अधिकारी एवं प्रहरी नायब उपरीक्षक (डिएसपी) दीपक श्रेष्ठले जानकारी दिनुभयो।

दुर्घटनामा पतही देवीकी छोरी ११ वर्षीया अंशु कुमारीसहित चक्रघट्टा गाउँपालिका–५, पडरियाकै २६ वर्षीया शान्ति देवी, उहाँकी छोरी नौ वर्षीया सुस्मिता कुमारी र ४० वर्षीया गीता देवी घाइते हुनुभएको हो। चारै जना घाइतेको प्रादेशिक अस्पताल मलङ्गवामा उपचार भइरहेको छ। भारतको मढियास्थित मन्दिरमा जल चढाएर फर्किएका तीर्थयात्री बोकेर चक्रघट्टा गाउँपालिका–५, पडरियातर्फ जाँदै गरेको ज २ त ३२७ नम्बरको ट्याक्टर आइतबार बिहान ११ बजेतिर गम्हरिया छेउको नहरमा खसेर दुर्घटना भएको हो।

ट्याक्टर नियन्त्रण गुमाएर भरी पानी रहेको नहरमा खसेको प्रहरीले जनाएको छ। ट्याक्टरमा २५ जना तीर्थयात्री सवार रहेकोमा अन्य सकुशल रहेका छन्। दुर्घटनापछि फरार रहेका ट्याक्टर चालकको खोजी भइरहेको जिल्ला प्रहरी कार्यालय मलङ्गवाले जनाएको छ। त्यसतै शनिबार साँझ भारतीय बोलबम तिर्थयात्री चढेको मोटरसाईकल दुर्घटना हुँदा ४ जना घाईते भएका छन् । ४ जना सवार द्यच् घण् ब् टढछद्ध नम्बरको भारतीय मोटरसाईकल शनिबार साँझ ५ बजे प्र. २(०३(००१ क १३०१ नम्बरको मिक्चर मेशिनमा पछाडीबाट ठोक्किदा दुर्घटना भएको हो ।

दुर्घटनामा परेर मोटरसाईकल चालक भारतको सितामाढी निवासी २३ वर्षीय सन्तोष निराउला तथा पछाडी सवार १२ वर्षीय नितेश यादव, १४ वर्षीय चन्द्रमोहन महतो र १६ वर्षीय रोहित यादव घाईते भएका छन् । बागमती पुलबाट भरत तालतर्फ तिव्र गतिमा गईरहेको मोटरसाईकल सोही दिशातर्फ गईरहेको मिक्चर मेशिनलाई ठक्कर दिएको हो । घाईते ४ जनाकै बागमती मोडेल अस्पताल कर्मैयामा उपचार भईरहेको प्रहरीले जनाएको छ ।