नाकामा अवरोध हटेपछि पर्यटक आवागमनमा सहज

काठमाडौँ। कोभिड–१९ महामारीका बेला तेस्रो मुलुकका पर्यटकलाई नेपाली नाका हुँदै भारत जान गरिएको अवरोध गृहमन्त्री रमेश लेखकको पहलपछि खुल्ला गरिएको छ। उक्त अवरोध हटेपछि नेपाल–भारत नाकाबाट पर्यटक आवागमनमा सहज भएको छ।

यही साउनको पहिलो साता गृहमन्त्री लेखकले गृह मन्त्रालयको पदभार ग्रहण गरेपछि भारतीय राजदूत नवीनकुमार श्रीवास्तवसँगको शिष्टाचार भेटमा भारतसँग जोडिएका नाकाबाट भारत प्रवेश गर्न तेस्रो मुलुकका नागरिकलाई अध्यागमन सेवामा गरिएको अवरोध हटाउने बारे छलफल गरेका थिए।

भारतीय पक्षले साउनको दोस्रो सातादेखि अध्यागमन सेवाको अवरोध हटाएर पहिलेकै अवस्थामा फर्काएपछि झापादेखि कञ्चनपुरसम्मका नाकाबाट पर्यटक आवागमन सहज भएको गृह मन्त्रालयले जनाएको छ।

गृह मन्त्रालयका अनुसार इलामको पशुपतिनगर नाकाबाट भारत जान भारततर्फ अध्यागमन कार्यालय नभएको बाहेक भारतसँग जोडिएका मुलुकका सबै नाकाबाट पर्यटक आवागमन सहज भएको छ।

कोभिड–१९ महामारी पछि भारतीय पक्षबाट अध्यागमन सेवा पुनः सुचारू हुँदा पर्यटकलाई सहज भएको अध्यागमनले जनाएको छ।

नाका सहज भएसँगै काँकरभिट्टा नाकाबाट ७८ जना तेस्रो मुलुकका पर्यटक भारततर्फ गएको र सो नाकाबाट एक सय १४ जना नेपाल भित्रिएका अध्यागमनले जनाएको छ।