माघ ११ गतेदेखि विराट एक्स्पो हुँदै

काठमाडौँ। मोरङ्ग जिल्लाको आर्थिक एवं औद्योगिक विकासका लागि उद्योग संगठन मोरङले ‘विराट एक्स्पो–२०२५’ आयोजना गर्न लागेको छ।

संगठनले विराटनगर महानगरपालिका–१४ जतुवास्थित डिग्री क्याम्पसको मैदानमा आगामी माघ ११ गतेदेखि २० गतेसम्म एक्स्पो (व्यापार तथा औद्योगिक मेला) आयोजना गर्न लागेको जानकारी दिइएको छ।

विराट एक्स्पोमा ९ वटा पेभिलियन (व्यापारी कक्ष) अन्तर्गत दुई सय ६८ स्टल रहने एक्स्पो व्यवस्थापन समितिले जानकारी दिएको छ। त्यहाँ नेपाल, भारत, पाकिस्तान र बंगलादेशका स्टार्टअप भिजन, कोशी ह्याकाथुन, रोजगार, व्यावसायिक सेवा प्रदायक, सूचना, शिक्षा तथा डिजिटल प्रविधि, अटोमोबाइल्सका, औद्योगिक कर्पोरेट, कृषि, पर्यटन, खाद्यका स्टल रहने जनाइएको छ।

एक्स्पो आयोजनाले यस क्षेत्रमा आर्थिक कारोबारमा वृद्धि हुने विश्वास लिइएको छ भने विराट एक्स्पो–२०२५ को सम्पूर्ण आन्तरिक तयारी पूरा भइसकेको र स्टलका लागि मैदान निर्माण सुरू भएको व्यवस्थापन समितिले जनाएको छ।