गोंगबु–गणेशस्थानमा विभत्स हत्याको रहस्य र पहिचान

काठमाडौं, २६ साउन । राजधानीको गोंगबु–गणेशस्थानमा भएको विभत्स हत्याको रहस्य र पहिचान खुलेको छ । दाङका कृष्णबहादुर बोहराको विभत्स हत्या भएको घटनाको अनुसन्धानमा जुटेको प्रहरीले पहिचान गरेको छ । प्रहरीले घटना भएको घर फेला पारेको छ । घटनास्थल मृतकको सुटकेशमा शव भेटिएको स्थानभन्दा ५० मिटरको दूरीमा रहेको छ । घटनास्थल नजिकैको ४ तले घरको एउटा कोठामा घटना भएको पाइएको अनुसन्धानबाट खुलेको प्रहरीले जनाएको छ ।

महानगरीय अपराध महाशाखाका प्रवक्ता एसपी ईश्वर कार्कीले घटना भएको घर फेला परेको जानकारी दिँदै प्रहरीले सो घरलाई सिल गरेर अनुसन्धान तथा सोधपुछ थालेको जानरीकारी दिएको छ । उनका अनुसार आइतबार बिहान टाउको र खुट्टा बिनैको शव सुटकेशमा भेटिएको स्थानभन्दा करिब ५० मिटरको दूरीमा घटनास्थल रहेको छ । मृतकका मामाले शवको सनाखत गरेसँगै प्रहरी घटनास्थलसम्म पुग्न सफल भएको थियो ।

यसअघि घटना भएको २४ घण्टासम्म प्रहरीले शवको शनाखत गर्न नसकेपछि समस्या भएको थियो । शवको सनाखतकै लागि प्रहरीले उनको फोटोसमेत सार्वजनिक गरेको थियो ।
मृतक काठमाडौंको नयाँ बजारस्थित एक गार्मेन्टमा कार्यरत रहेको खुलेको छ । उनको यस्तो विभत्स ढंगले हत्या कसले र किन गर्याे भन्नेबारे अनुसन्धानकै क्रममा रहेको भन्दै प्रहरीले छिट्टै सत्यतथ्य बाहिर ल्याउने जनाएको छ । प्रहरीले घटनामा संलग्न रहेको आशंकामा केही व्यक्तिलाई नियन्त्रणमा लिएर अनुसन्धान गरिरहेको बताइएपनि हथ्यमा संलग्नको औपचारिक पुष्टि हुन सकेको छैन ।

आइतबार बिहान ६ बजेतिर गोंगबुका स्थानीयले सडकछेउमा फालिएको सुटकेशबाट रगत बगेको देखेपछि प्रहरीलाई खबर गरेका थिए । लगत्तै घटनास्थलमा पुगेको प्रहरीले गणेशस्थान आसपासको छुट्टाछुट्टै स्थानमा सुटकेशमा शव र जेब्रा झोलामा पुरुषको टाउको फेला परेको थियो ।
गोंगबु विभत्स हत्याकाण्ड कुकुरले सुँघेर टाउको र खुट्टा अर्कै ठाउँमा भेटिएको थियो ।