बालिका माथि विद्यालयमा हुने यौनजन्य हिंसाका घटनामा महिला आयोगद्वारा ध्यानाकर्षण

बारा,कार्तिक २९/
राष्ट्रिय महिला आयोगले विद्यालयमा हुने यौन हिँसाका घटनाहरु बढ्दै गएकोमा चिन्ता व्यक्त गर्दै बाराको रजघट्टामा महिला हिँसा निवारणको सम्बन्धमा अभिमुखीकरण कार्यक्रम गरेको छ । शिक्षक विद्यार्थी र विद्यालय व्यवस्थापनका पदाधिकारीसँग विद्यालय स्तरमा हुने महिला हिंसा निवारणका सम्बन्धमा अभिमुखीकरण कार्यक्रम जीतपुरसिमरा उपमहानगरपालिका वडा नं १४ स्थित जनता माविमा रजघट्टामा आयोगले सञ्चालन गरेको हो ।
कार्यक्रममा राष्ट्रिय महिला आयोगका सदस्य कृष्णकुमारी खतिवडाले घरमा अभिभावक असाध्यै व्यस्त रहने बालबालिकालाई समय दिन नसक्ने र विद्यालयमा अत्यधिक समय व्यथित गर्दा विद्यालयमै बालिकाहरु हिँसामा पर्ने गरेकोले विद्यालयमा हिँसा न्यूनीकरणसम्बन्धी जनचेतना जगाउनुपरेको जनाएकी छिन् ।

धेरै घटना अभिभावकले बालवालिकालाई समयनदिने र धेरै समय विद्यालयमै विताउनुपर्ने, अभिभवकले छोराछोरीसँग बोल्न नभ्याउने र हिँसाका घटना एकपछि अर्कौ दोहोरिँदै जानुले विद्यालयस्तरमा यस्ता कायृक्रम गर्नुपरेको हो’ । खतिवडाले भनिन् ‘काठमाडौँ जस्तो ठाउँमा त विद्यालयमा बालिका सुरक्षित छैनन् भने गाउँमा , मधेसमा अवस्था कस्तो होला भनेर कार्यक्रमको आयोजना गरेका हौँ’ ।
कार्यक्रममा इलाका प्रहरी कार्यालय सिमराका प्रहरी नायव निरीक्षक युवराज तिमल्सेनाले साइबर क्राइम र यसका सजायका बारेमा कार्यपत्र प्रस्तुत गर्नु भएको थियो ।
त्यसैगरी जनता मावि रजघट्टाका प्रधानाध्यापक राजु अधिकारीले लैँगिक हिँसा न्यूनीकरणसम्बन्धीको कार्यपत्र प्रस्तुत गर्नुभयो भने राष्ट्रिय महिला आयोगका मनोपरामर्शकर्ता पार्वती सुवेदीले विद्यालयमा मनोसामाजिक सहयोगसम्बन्धी कार्यपत्र प्रस्तुत गरेका थिए । अभिमुखीकरण कार्यक्रमले विद्यालय र समाजमा सचेतना जगाउन सहयोग पुगेको कार्यक्रमका सहभागि जनता माविका प्रावि इन्चार्ज गीता थपलिया, नेरामावि फत्तेपुरका सहायक प्रअ किशोरीलाल बछार, सहभाभगी छात्रा अर्चना सापकोटा, दीपककुमार पटेलले धारणा ब्यक्त गरेका थिए ।
कार्यक्रममा जनतामावि रजघट्टा, नेपाल राष्ट्रिय मावि डुमरवाना, नेरामावि फत्तेपुरका प्रधानाध्यापकहरु विद्यालय व्यवस्थापन समितिका पदाधिकारी, शिक्षक र विद्यार्थर्कीो सहभागिता रहेको थियो । कार्यक्रममा जीतपुरसिमराका प्रमुख राजन पौडेल मन्तव्य राखेका थिए भने कार्यक्रमको सहजीकरण भवन खड्काले गरेका हुन् ।