दार्चुला घटनाबारे भारतसमक्ष औपचारिक विरोध जनाउन सरकारसँग प्रमुख प्रतिपक्ष एमालेको माग

साउन १९ । प्रमुख प्रतिपक्ष एमालेले दार्चुला घटनामा भारतसँग औपचारिक विरोध जनाउन सरकारसँग माग गरेको छ ।

भारतीय सीमा सुरक्षा बलले महाकालीमाथिको तुइन काटिदिँदा जयसिंह धामी नदीमा बेपत्ता भएको घटनाबारे औपचारिक विरोध जनाउन एमालेले मंगलबार संसद्‍मा माग गरेको हो ।

दार्चुलाबाट प्रतिनिधित्व गर्ने एमालेका सांसद गणेशसिंह ठगुन्नाले एमालेको तर्फबाट उक्त माग गरिएको प्रतिनिधिसभाको बैठकमा जानकारी गराए ।

घटनाको छानबिनको लागि संसदीय छानबिन समिति गठन गर्न र घटनाको औपचारिक रूपमा भारतसमक्ष विरोध जनाइयोस् र दोषीलाई कारबाही गर्न पहिल गरियोस् उनले भनेका छन् । साथै धामीका परिवारलाई सरकारले क्षतिपूर्ति गर्नुपर्ने पनि एमालेको माग छ ।

सांसद ठगुन्नाले दार्चुला घटनालाई स्थानीय प्रशासनले साम्य पार्ने प्रयास गरिरहेको आरोप लगाएका छन् । उनले स्थानीय प्रशासन र गृह मन्त्रालयले घटनालाई गम्भीर रूपमा नलिएको पनि आरोप लगाए ।

यस्ता घटना निरन्तर भइरहेको सांसद ठगुन्नाको भनाइ थियो । सडकलगायत पूर्वाधार निर्माण गर्नुपर्ने उनको माग थियो ।डडेल्धुराबाट प्रतिनिधित्व गर्ने प्रधानमन्त्री शेरबहादुर देउवाले दार्चुलाको पीडा बुझ्ने आफूले अपेक्षा राखेको सांसद ठगुन्नाले बताए ।

सांसद ठगुन्नाले दार्चुला खलङ्गा-तिंकर-कालापानी सडकलाई राष्ट्रिय गौरव आयोजनामा राख्न माग गरेका छन् । उनले त्यो सडक खन्ने जिम्मेवारी नेपाली सेना र स्थानीय युवाहरूलाई दिन पनि माग गरेका छन् । सडक निर्माण भएमा आफ्नै जिल्लाको सदरमुकाम आउनका लागि भारतको बाटो प्रयोग गर्न र तुइन तर्न नपर्ने उनको भनाइ थियो ।