योग्यताको आधारमा विश्वविद्यालयमा उपकुलपति नियुक्ति

काठमाडौँ । कुलपति एवं प्रधानमन्त्री पुष्पकमल दाहाल ‘प्रचण्ड’ ले अब योग्यताको आधारमा त्रिभुवन विश्वविद्यालयमा उपकुलपतिको नियुक्ति गर्ने प्रतिबद्धता जनाएका छन् ।

विश्वविद्यालयको ४९औं दीक्षान्त समारोहलाई सम्बोधन गर्दै उनले त्रिभुवन विश्वविद्यालयबाटै राजनीतिक भागबन्डाको अन्त्य गर्नेसमेत प्रतिबद्धता जाहेर गरे । उनले नेपालमा आधारभूत शिक्षा मात्र निःशुल्क नभइ विश्वविद्यालयको शिक्षालाई पनि सर्वसुलभ बनाउन काम गरिरहेको बताए ।

उनले आर्थिक हैसियत भएकाहरुको मात्र उच्च शिक्षामा पहुँच हुन नहुने पनि धारणा व्यक्त्त गरे । उच्च शिक्षा नीतिअनुरुप विश्वविद्यालयको शिक्षामा पनि समयानुकूल सुधार गर्दै लगिएको बताए ।

‘कतिपय विकसित देशमा आधारभूत शिक्षा मात्र निःशुल्क होइन, विश्वविद्यालय शिक्षा पनि सर्वसुलभ बनाइएको छ । हामी पनि सोही दिशामा अग्रसर भइरहेका छौं । आर्थिक हैसियत भएकाहरुको मात्र उच्च शिक्षामा पहुँच हुनु हुँदैन भन्ने हाम्रो स्पष्ट दृष्टिकोण छ । विपन्न वर्गले शिक्षा प्राप्त गर्न नसक्ने स्थिति हटाइ समतामूलक, सबै वर्ग, समुदायले उच्च शिक्षामा सर्वसुलभ पहुँच हुनुपर्दछ,’ उनले भने, ‘यसका लागि उच्च शिक्षा नीतिअनुरुप विश्वविद्यालय शिक्षामा पनि समयानुकूल सुधार गर्दै लैजाने हाम्रो प्रयास छ । देशको समृद्धिमा प्राविधिक जनशक्तिको महत्त्वपूर्ण योगदान रहन्छ । त्रिभुवन विश्वविद्यालयबाटै राजनीतिक भागबन्डाको अन्त्य गर्ने र मेरिटको आधारमा भीसी नियुक्ति गर्ने प्रतिबद्धता जनाउँछु ।’

प्रधानमन्त्री दाहालले आफ्ना विद्यार्थीलाई विश्वबजारमा अब्बल प्रमाणित गर्नसक्ने बनाउनु त्रिभुवन विश्वविद्यालयको आजको चुनौती रहेको पनि बताए ।