देशभर तापक्रम घट्दै

मौसम पूर्वानुमान महाशाखाले देशभर तापक्रम घट्ने क्रममा रहेकाले चिसोबाट बच्न र सचेत रहन आग्रह गरेको छ।

महाशाखाले मङ्गलवार बिहान तीन दिने मौसम बुलेटिन सार्वजनिक गर्दै चिसोबाट बच्न आवश्यक सतर्कता अपनाउन आग्रह गरेको हो।

महाशाखाले देशमा पश्चिमी वायुको आंशिक प्रभाव रहेको र देशको पूर्वी र मध्य पहाडी भू–भागमा आंशिक बदली हुने र बाँकी भू–भागमा सामान्यतया मौसम सफा रहेको जनाएको छ।

यसै गरी मङ्गलवार कोशी, मधेस, बागमती, गण्डकी र लुम्बिनी प्रदेशमा आंशिक बदलीदेखि सामान्यतया सफा तथा बाँकी भू–भागमा मौसम सामान्यतया सफा रहने बताइएको छ ।

भोली बुधवार भने देशभर आंशिक बदली देखि सामान्यतया मौसम सफा रहनेछ। बिहीबार कोशी प्रदेशको पहाडी भू–भागमा आंशिक बदली भई बाँकी भू–भागमा भने मौसम सामान्यतया सफा रहने उल्लेख जनाएको छ।