सडक बत्तीको ६ अर्ब रूपैयाँ बक्यौता तत्कालै तिर्न स्थानीय तहलाई प्राधिकरणको निर्देशन

काठमाडौँ । नेपाल विधुत प्राधिकरणले देशभरका विभिन्न स्थानीय तहलाई बक्यौता विधुत महसुल भुक्तानी गर्न आग्रह गरेको छ।

प्राधिकरणले आज एक सूचना प्रकाशित गर्दै देशभरका विभिन्न स्थानीय तहले सडक बत्ती प्रयोग गरेबापतको ६ अर्ब रुपैयाँ भुक्तानी नगरेको भन्दै तत्काल उक्त रकम तिर्न भनेको हो।

‘रीतपूर्वक सडक बत्तीको ग्राहक नबन्ने, बक्यौता महशुल समर्थन नगर्ने, महशुल नतिर्ने र बिनामिटर नेपाल विधुत प्राधिकरणको स्वीकृति नलिई अनधिकृत तवरबाट सडक बत्ती जडान गरी प्रयोग गर्ने स्थानीय तहको सडक बत्ती र कार्यालयको समेत विधुत लाइन जुनसुकै बेला काटिन सक्ने ब्यहोरा यसै सूचनामार्फत जानकारी गराइन्छ,’ प्राधिकरणको प्रकाशित सूचनामा उल्लेख गरिएको छ।